Benvengudi ara naua web de Lauegi!

//Benvengudi ara naua web de Lauegi!

Coma podetz veir, aguesta tempsada estream web en Centre de Lauegi deth Conselh Generau d’Aran. Dilhèu auratz de besonh un temps entà acostumar-vos-i. Entà hè’c mès facil vos resumim aciu coma s’estructure era naua informacion.

Ua optica classica ara gestion deth perilh de lauegi ei era que s’abòrde des de tres punts de vista: es condicions (dera nhèu, eth perilh de lauegi e eth temps), eth terren e eth grop. Era naua web manten aguest plantejaments e s’estructure ath torn deth triangle des lauegi, entà ajudar-vos en toti es aspèctes. Des deth Bulletin de Lauegi diari tàs 8 deth maitin, passant pera Classificacion deth Terren de Lauegi enquiàs conselhs des Bones Abituds o es corsi, tot vire ath torn d’aguesta idea. Normauments dus des costats deth triangle seran fixes: voi gésser aué (damb es condicions presentes) damb un grop determinat (de coneishements e capacitats definides), tà on poderia anar? (era eleccion deth terren s’adapte as condicions e eth grop). O ben: voi esquiar aqueth itinerari (terren fixe) damb aguesti amics (grop fixe), quines condicions aurie d’auer? E atau totes es combinasons possibles.

Coma tostemp, sajam de dar era maxima informacion dera forma mès grafica possibla. Auem hèt quauque cambi en bulletin (qu’explicam en ua auta entrada) e auem metut molta informacion en tres mapes diferentes: era de condicions, era d’estat des pistes forestaus e era dera classificacion deth terren de lauegi. Podetz explorar es pestanhes qu’auetz ena part superiora dera plana, o entà centrar era atencion en çò qu’ei mès basic, podetz usar es tres botons ath pè dera mapa:

Aguest boton da accès ath bulletin de perilh de lauegi entara Val d’Aran qu’actualizam cada dia tàs 8 deth maitin tot er iuèrn. Entre aguesta informacion e era qu’auetz ena mapa de condicions qu’aparesh en inici (fòtos, perfils, estacions automatiques, webcams, lauegi…) podetz accedir a molta informacion sus es condicions de lauegi, nhèu e temps en Aran.

Per aciu accediratz dirèctaments ath mapa de Classificacion deth Terren de Lauegi (ATES enes sigles en anglés). Tanben auetz ua entrada ath Blog a on vos parlam mès d’aguest metòde desvolopat en Canadà entara avaloracion dera seriositat d’un terren deuant deth perilh de lauegi. Podetz guardar dirèctaments aguest mapa ena web o, milhor encara, baishar-vos er archiu kml e guardar-lo en vòste Google Earth.

Des elements que proporcionam ath torn deth grop, aguest boton vos pòrte enquiar Evaluador, un estrument que combine es condicions de perilh damb eth terren e establís eth nivèu de capacitats e coneishements qu’eth grop a de besonh entà circular damb seguretat. Non desbrembetz de hèr ua uelhada tanben as Bones Abituds e ath nòste programa de corsi.

Maugrat que i a mès nauetats, deisham que les descorbísquetz pòc a pòc a mesura que les auetz de besonh. Sonque volem destacar dus aspèctes dera web naua que mos agradarie que siguessen centraus a compdar d’ara: er un ei ahèr nòste, eth Blog, e er aute depen de vosati, eth formulari d’observacions. Nosati, laguens deth ritme qu’acostume a comportar era tempsada de nhèu, guardam d’auer un Blog damb es recomanacions, reflexions, curiositats que non caben pas enes bulletins ne ena rèsta de seccions actualizades. Per un aute costat, sabetz coma ei de fondamentau era vòsta ajuda entà qu’era informacion que ges d’ací sigue complèta e actualizada. Vos hèm facil er enviament d’aguestes observacions mejançant eth formulari, e mos comprometem a penjar ena mapa de condicions totes aqueres que siguen significatives.

2015-11-18T12:29:10+00:00 29/10/2013|

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información. ACEPTAR

Aviso de cookies